करिअर फ्लॉप असूनही कोट्यवधींचा मालक आहे फरदीन खान

मुंबई :  फरदीन खान बॉलिवूडचे प्रसिद्ध अभिनेते फिरोज खान यांचा मुलगा आहे. दरवर्षी बॉलिवूडमध्ये अनेक नवीन चेहरे येतात. त्यातले काही हिट होतात तर काहींना अपयशाला सामोरं जावं लागतं. असाच एक स्टार किड म्हणजे फरदिन खान, फिरोज खानचा मुलगा सुपरस्टार होईल अशी आशा साऱ्यांनाच होती. मात्र प्रत्यक्षात तसं काही झालं नाही फरदीनचे सुरुवातीचे दोन- तीन सिनेमे हिट झाले होते. पण यानंतर अपयशाने त्याची पाठ सोडली नाही. गेल्या नऊ वर्षांमध्ये फरदीन एकाही सिनेमात दिसला नाही. असं म्हटलं जातं की, एक चूक आणि अमली पदार्थांच्या आहारी गेल्यामुळे फरदीनचं सिनेकरिअर जवळपास संपुष्टात आलं.

 

 

नारकोटिक्स कंट्रोल ब्यूरोने २००१ मध्ये फरदीन खानला अमली पदार्थांचं सेवन करण्याबाबत अटक केली होती. यानंतर मुंबईतील एका विशेष न्यायलयाने त्याच्यावर खटला भरला होता. यात फरदीनने स्वतःचा गुन्हा मान्य केला आणि २०१२ मध्ये त्याची या गुन्ह्यातून सुटका करण्यात आली. 'नारकोटिक ड्रग्स एंड साइकोट्रॉपिक सब्सटांसेज (एनडीपीएस)' त्याची सुटका करताना स्पष्ट केलं की, जर फरदीनला पुन्हा या गुन्ह्याखाली अटक करण्यात आली तर त्याला दिलेली ही सूट काढून घेण्यात येईल.

 

यानंतर फरदीनला काही काळासाठी रिहॅबमध्ये पाठवण्यात आले होते. त्याची ही चूक फरदीनला महागात पडली. या घटनेनंतर फरदीनचं करिअर संपुष्टात आलं आणि तो मोठ्या पडद्यापासून दूर फेकला गेला. सिनेमांपासून दूर असूनही तो वडिलांची संपत्ती सांभाळत आहे. फिरोज खान यांची बंगळुरू येथे १०० एकरपेक्षाही जास्त जमीन आहे. तिथे त्यांचं एक फार्महाउसही आहे. एका मुलाखतीत फरदीन म्हणाला की, सध्या तो संहिता वाचत असून लवकरच तो दिग्दर्शक किंवा निर्मात्याच्या रुपात प्रेक्षकांच्या भेटीला येईल.