शहापुर तहसिलदारांविरोधात पत्रकार एकवटले

तहसीलदारांच्या विरोधात १५ ऑगस्टपासून होणार बेमुदत साखळी उपोषणशहापुरच्या तहसीलदार निलिमा सूर्यवंशी या आपत्ती व्यवस्थापन प्रमुख असल्याने कोविड काळात सुयोग्य नियोजन करून अंमलबजावणी करणे त्यांची मुख्य जबाबदारी आहे. पण आपल्या यंत्रणेतील अधिकारी, कर्मचाऱ्यांशी समन्वय नसल्याने, मनमानी स्वभावामुळे तसेच नियोजनशून्य कारभारामुळे शहापूर तालुक्यातील कोरोनाग्रस्तांची संख्या दिवसेंदिवस प्रचंड वेगाने वाढत गेली. सातत्याने त्यांच्याविरोधात येणाऱ्या तक्रारी बघता आमदार दौलत दरोडा यांनी तहसीलदारांची बदली करण्यासाठी थेट राज्याचे उपमुख्यमंत्री अजित पवार यांच्यापर्यंत धाव घेतली. पण त्यांच्या प्रयत्नांना अजूनही यश आले नाही. इतर राजकीय आणि सामाजिक क्षेत्रातील पुढाऱ्यांनीही पाहिजे तशी आक्रमक भूमिका घेतली नाही. त्यातच आपल्या कर्तव्यात कसूर करणाऱ्या अधीक्षक डॉ. बनसोडे यांना जाब विचारायला गेल्या राजकीय, सामाजिक आणि पत्रकार क्षेत्रातील व्यक्तींवर बनसोडे यांनी गुन्हे दाखल करूनही कुणीही पाहिजे तशी ठोस भूमिका घेतली नाही. लोकप्रतिनिधी आणि इतर पुढारी यांचा काहीही दबाव नसल्याने तहसीलदार यांच्या मनमानी कारभाराला वैतागून शहापूर तालुक्यातील पत्रकांनी एकत्र येऊन जनतेच्या हितासाठी स्वातंत्र्यदिनापासून साखळी उपोषण करण्याचा निर्णय घेतला आहे. त्याबाबतीत योग्य नियोजनसुद्धा झालं आहे.येत्या १५ ऑगस्टपासून होणाऱ्या या उपोषणाला पत्रकार, पत्रकार संघ, विविध सामाजिक संघटना, राजकीय पक्ष तसेच वैयक्तिक पाठिंबा मिळताना दिसत आहे. त्यामुळे तहसीलदार यांच्या विरोधातील हे पत्रकारांचे उपोषण आताच जोमाने पेट घेत असल्याचे चित्र दिसत आहे.