डिलिव्हरीनंतर घटवा तुमचे वाढलेलं वजन

डिलिव्हरीनंतर कोणत्याही महिलेला लगेचच कठीण व्यायाम प्रकार करण्यास सक्त मनाई केली जाते. विशेषतः सिझेरियन डिलिव्हरी झाल्यास भरपूर काळजी घ्यावी लागते. पण तुम्हाला आपल्या दैनंदिन आयुष्यात व्यायाम करायचाच असल्यास पर्याय म्हणून तुम्ही वॉक (चालण्याचा व्यायाम) करू शकता. भरपूर चालण्यामुळे डिलिव्हरीनंतर वाढलेले वजन कमी होण्यासोबत हृदयाचे आरोग्य सुधारते, शरीरात ऊर्जा वाढते आणि तणावाविरोधात लढण्यास शक्तीही मिळते. बाळंतपणानंतर चालणे हा महिलांसाठी सर्वात चांगला व्यायाम आहे. लिफ्टऐवजी पायऱ्यांचा वापर करावा. याव्यतिरिक्त बाळ मोठे झाल्यानंतर त्याच्यासोबत चालण्याचा सराव करावा. हळूहळू आपल्या चालण्याच्या व्यायामाचा कालावधी वाढवा.

 

स्तनांचा आकार बिघडू नये, यासाठी काही महिला आपल्या बाळाला स्तनपान करणं टाळतात. पण हा प्रकार पूर्णतः चुकीचा आहे. कारण तुम्ही जितके अधिक प्रमाणात आपल्या बाळाला अंगावरचे दूध पाजाल, तितक्या जास्त प्रमाणात तुमच्या शरीरातील कॅलरी बर्न होतात. स्तनपानामुळे तुमच्या चयापचयाची क्षमता सुधारते. योग्य प्रकारे स्तनपान केल्यास महिलांचं वजन कमी होण्यास मदत होते, असे कित्येक डॉक्टरांचं म्हणणं आहे. स्तनपानामुळे शरीरातील जवळपास ३०० ते ५०० कॅलरी बर्न होतात. यामुळे तुमच्या शरीरातील अतिरिक्त चरबी लवकर कमी होते.

 

 

 

बाळाला जन्म दिल्यानंतर लगेचच कठीण व्यायाम प्रकार करणं टाळावं. वजन कमी करण्यासाठी सोपी योगासने आणि व्यायाम केल्यास फायदेशीर ठरेल. डिलिव्हरीच्या दोन ते तीन महिन्यानंतर तुमचे शरीर कठीण स्वरुपातील कोणतीही हालचाल करण्यास तयार होते. वास्तविक पाहता बाळाला जन्म दिल्यानंतर वजन घटवण्यासाठी नियमित स्वरुपात व्यायाम करणंच प्रभावी उपाय ठरेल. पण यासाठी घाई करू नका. कारण सिझेरियन डिलिव्हरीनंतर कोणतीही जड वस्तू उचलण्यास सक्त मनाई असते. व्यायामासह पौष्टिक आहार देखील घ्यावा. नियमित व्यायाम केल्यास तुम्हाला थकवाही जाणवणार नाही. स्नायू बळकट होण्यासाठी आणि चयापचयाच्या क्षमतेमध्ये सुधारणा होण्यासाठी शारीरिक कसरती करणं आवश्यक आहे.

 

वजन कमी करण्यासाठी तुम्ही अथक परिश्रम करत आहा, तर शरीर हायड्रेटेड ठेवण्यासाठी पुरेशा प्रमाणात पाणी पिणे गरजेचं आहे. पाण्यामुळे शरीरातील कॅलरी बर्न होण्यास (जळण्यास) आणि चयापचयाची क्षमता वाढवण्यास मदत होते. नियमित १० ते १२ ग्लास पाणी प्यायला हवे. पाण्यामुळे शरीरातील विषारी पदार्थ देखील बाहेर फेकले जातात. सकाळी आणि संध्याकाळी लिंबू पाण्याचे सेवन केल्यास शरीरातील अतिरिक्त चरबी कमी होण्यास मदत मिळेल.

 

बाळासह स्वतःच्या आरोग्यासाठी महिलेनं आरोग्यवर्धक आणि पौष्टिक आहाराचं सेवन करणं गरजेचं आहे. वजन घटवण्यासाठी शारीरिक कसरती करणे जितके आवश्यक आहे, तितकेच पौष्टिक आहार करणं देखील महत्त्वाचे आहे. स्तनपानामुळे वारंवार भूक लागणे ही सामान्य बाब आहे. पण भूक मिटवण्यासाठी जंक फूड किंवा पौष्टिक नसलेले अन्नपदार्थ खाणे टाळा. हे पदार्थ तुमचं वाढवण्यात मदत करतात. एका संशोधनातील माहितीनुसार, पौष्टिक आहाराच्या कमतरतेमुळे आणि कमी शारीरिक कार्यामुळे बाळंतपणानंतर वजन वाढीचा धोका अधिक असतो.