इटलीत करोनाचे थैमान सुरूच; जगात १४ हजारांचा बळी

इटली : करोनाचे केंद्र बनलेल्या इटलीमध्ये अजूनही मृत्यूचे थैमान सुरूच असून, एका दिवसांत अनेक रुग्णांचा मृत्यू झाल्यामुळे त्या देशातील आकडा ५४७६ वर गेला आहे. या पार्श्वभूमीवर त्या देशाचे पंतप्रधान गिसप कोंटे यांनी शनिवारी रात्री उशिरा टीव्हीवरून जनतेला संबोधित करताना महत्त्वाचे नसलेले सर्व कारखाने बंद करण्याचे आदेश दिले आहेत. जगभरातील एकूण करोना मृत्यूंपैकी एक तृतीयांश मृत्यू इटलीत झाले असून, चीन व इराणमधील एकूण मृत्यूंपेक्षाही इटलीमधील बळींचा आकडा मोठा आहे. 'करोना'ची लागण झालेल्यांपैकी ८.६ टक्के रुग्णांचा मृत्यू होत असून, हा मृत्यूदर अन्य देशांच्या तुलनेत खूप मोठा असल्याने चिंता वाढत आहेत.

 

 

संपूर्ण जगाला वेठीला धरलेल्या करोना विषाणूच्या आजाराचा धुमाकूळ अद्यापही सुरूच असून, या आजारामुळे मृत्युमुखी पडलेल्या व्यक्तींचा आकडा १४ हजारांच्या पलीकडे गेला आहे. जगभरात एकूण तीन लाखांहून अधिक व्यक्तींना या आजाराची लागण झाली आहे. करोनाचा प्रसार रोखण्यासाठी अनेक देशांनी कडक निर्बंध घातल्यामुळे जवळजवळ एक अब्जाहून अधिक लोक रविवारी आपापल्या घरांमध्ये अडकले. जगभरात ३५हून अधिक देशांमध्ये या साथीमुळे 'लॉकडाउन'चा निर्णय घेण्यात आला आहे. त्यामुळे दैनंदिन जीवनासह व्यवसाय, प्रवास यांना फटका बसला असून, अनेक देशांनी आपल्या सीमा बंद केल्या आहेत. 'करोना'च्या परिणामामुळे येऊ घातलेल्या आर्थिक संकटाचा सामना करण्यासाठी काही देशांनी अब्जावधी डॉलरच्या रकमेची पॅकेज जाहीर केली आहेत. करोनाचा संसर्ग जगातील १५० हून अधिक देशांमध्ये पसरला आहे.

 

माद्रिद : स्पेनमध्ये 'करोना'मृतांचा आकडा रविवारी ३२ टक्क्यांनी वाढून १,३२६ वर गेला. देशभरात तब्बल २५ हजार व्यक्तींना 'करोना'ची बाधा झाली आहे. या आपत्कालीन स्थितीत तात्पुरत्या स्वरूपाचे रुग्णालय उभारण्यासाठी स्पेनमध्ये ५२ हजार वैद्यकीय कर्मचाऱ्यांना कामाला लावण्यात आले आहे. या पार्श्वभूमीवर पंतप्रधान पेद्रो सँचेझ यांनी देशापुढे खूप कठीण काळ येणार असून, त्याला तोंड देण्यासाठी भावनिक, मानसिकदृष्ट्या तयार राहण्याची गरज व्यक्त केली आहे.

 

पॅरिस: फ्रान्समध्ये शनिवारी एका डॉक्टरचा कोव्हिड १९मुळे मृत्यू झाला. कोणाही डॉक्टरचा हा फ्रान्समधील पहिलाच मृत्यू आहे. हा डॉक्टर कोम्पिएन येथील हॉस्पिटलमध्ये कार्यरत होता, अशी माहिती फ्रान्सचे आरोग्यमंत्री ऑलिव्हर व्हेरान यांनी दिली. फ्रान्समध्ये या भागातच करोनाचा फैलाव सर्वाधिक आहे. फ्रान्समध्ये कोव्हिड १९मुळे आतापर्यंत ५६२ जणांचा मृत्यू झाला असून, ६१७२ रुग्ण हॉस्पिटलमध्ये दाखल आहेत. फ्रान्समध्ये ही लॉकडाऊन करण्यात आले आहे.

 

'करोना'च्या पार्श्वभूमीवर घातलेल्या निर्बंधांची कडक अमलबजावणी करून लोक घरीच राहतील, याची खबरदारी घेण्यासाठी फ्रान्समध्ये हेलिकॉप्टर आणि ड्रोन यांचा वापर करण्यात येणार आहे. फ्रान्समध्ये करोनाच्या मृतांची संख्या ६७४ वर गेली असून, १४ हजारांहून अधिक जणांना संसर्ग झाला आहे. योग्य परवानगीविना घराबाहेर पडल्यास १३५ युरोंचा (सुमारे ११ हजार रु.) दंड लावण्यात येत आहे. 'हेलिकॉप्टरमुळे मोठा परिसर नजरेच्या टप्प्यात येईल आणि प्रत्यक्ष काय सुरू आहे, हे कळेल. त्यानुसार जमिनीवर गस्त घालणाऱ्या जवानांना मार्गदर्शन करता येईल,' असे संबंधित यंत्रणांनी सांगितले. फ्रान्समध्ये मंगळवारपासूनच 'लॉकडाउन' करण्यात आले असून, अत्यंत अपवादात्मक परिस्थितीतच घराबाहेर पडण्यास परवानगी आहे. खबरदारी घेण्यासाठी एक लाखांहून अधिक पोलिस तैनात करण्यात आले आहेत.

 

अनेक देशांमध्ये करोनाची चाचणी करण्याची क्षमता मर्यादीत असल्याने नेमकी रुग्णसंख्या समजण्यात अडचणी येत आहेत. त्यातच आफ्रिका खंडातही 'करोना'चा एक हजारांहून अधिक जणांना संसर्ग झाल्याची माहिती समोर आली आहे. आफ्रिकेत अनेक देशांमध्ये मर्यादित आरोग्य सेवा आणि शहरांमधील गर्दीमुळे उपचारांचे मोठे आव्हान आहे. तर, चीनमध्ये चार दिवसांनंतर प्रथमच 'करोना'चा स्थानिक संसर्ग झालेल्या रुग्णाची नोंद करण्यात आली आहे. मागील तीन दिवस येथे एकही स्थानिक रुग्ण नव्हता. मात्र, बाहेरून येणाऱ्या व्यक्तींना संसर्ग झाल्याची प्रकरणे समोर येत असल्याने हा संसर्ग रोखताना कसोटी लागणार आहे.

 

तेहरान : मध्य पूर्वेतही अनेक देशांमध्ये सतर्कतेचा इशारा देण्यात आला असून, इराणमध्ये शनिवारी आणखी १२३ जण 'करोना'मुळे दगावले. त्यामुळे मृतांचा आकडा १,६८५ वर गेला आहे. मात्र, या परिस्थितीतही देशांत निर्बंध घालण्यात आलेले नाहीत. दुसरीकडे, 'करोना'चा विषाणू अमेरिकेनेच तयार केला असून, हा अमेरिकेचा कट असल्याचा आरोप करत इराणचा सर्वोच्च नेता अयातुल्ला खामेनी याने अमेरिकेची मदत नाकारली आहे. इराणमध्ये संसर्ग आणि मृत्यू टाळण्यात अपयश येत असतानाच, विषाणू हा कटाचा भाग असल्याचा दावा करत आपल्यावरील दोष ढकलण्याचा प्रयत्न खामेनी याने केला आहे.

 

अमेरिकेचे अध्यक्ष डोनाल्ड ट्रम्प यांनी 'घरीच राहा, जीव वाचवा,' असा इशारा अमेरिकनांना दिला आहे. 'राष्ट्रीय पातळीवर सामायिक त्याग करण्याची ही वेळ आहे. आपल्या प्रियजनांना जपण्याची ही वेळ आहे. आपल्यासाठी जे सगळ्यात मोलाचे आहे, ती आपली श्रद्धा, कुटुंब, शेजारी आणि आपला महान देश यांना जपण्याची ही वेळ आहे,' असे ट्रम्प यांनी व्हाइट हाउसमध्ये घेतलेल्या पत्रकार परिषदेत सांगितले. आपण लवकरच ('करोना'वर) हा विजय साजरा करू, असा आशावादही त्यांनी व्यक्त केला. दरम्यान, अमेरिकेतील तब्बल एक तृतीयांश लोकसंख्या सध्या 'लॉकडाउन'मध्ये आहे. न्यूयॉर्क, शिकागो आणि लॉस एंजेलिसमध्ये कडक निर्बंध असून, अन्य भागांतही याची तीव्रता वाढवली जाण्याची शक्यता आहे.

 

लंडन : करोना विषाणू प्रचंड वेगाने पसरत असून, त्याचा धोका असलेल्या १५ लाख लोकांनी पुढील १२ आठवड्यांसाठी घरीच राहावे, असा इशारा ब्रिटनचे पंतप्रधान बोरिस जॉन्सन यांनी दिला आहे. एकमेकांपासून दूर राहण्याचा इशारा लोक फारसा गांभीर्याने घेत नसल्याची चिंता व्यक्त होत असतानाच ब्रिटनमध्ये हा इशारा देण्यात आला आहे. इटलीची आरोग्य यंत्रणा सक्षम असतानाही, तेथील डॉक्टर आणि परिचारिकांवर कमालीचा ताण येत असल्याची आठवण करून देतानाच, आपण इटलीच्या केवळ दोन ते तीन आठवडे मागे आहोत, असा इशाराही त्यांनी दिला आहे. ब्रिटनमध्ये 'करोना'मृत्यूंचा आकडा २३३ वर गेला असून पाच हजारांवर लोकांना याची लागण झाली आहे.