महाराष्ट्रात कोरोनाचा तिसरा बळी; कोरोना बाधितांचा आकडा 89 वर

मुंबई :  मुंबईतील खासगी रूग्णालयात या कोरोना बाधिताचा मृत्यू झाला आहे. मृत व्यक्ती ५९ वर्षीय असून फिलिपिन्स येथून आला होता. त्यामुळे महाराष्ट्रात कोरोनाने एकूण तीन जणांचे बळी घेतले आहेत महाराष्ट्रातील कोरोना बाधित रुग्णांच्या संख्येतही १५ ने भर पडली आहे. राज्यात आणखी १५ रूग्ण आढळून आले आहेत. त्यापैकी मुंबईतील १४ तर पुण्यातील एक आहे. त्यामुळे राज्यातील कोरोनाग्रस्तांचा आकडा आता ८९वर पोहोचला आहे. महाराष्ट्रासाठी आणि मुबंईसाठी ही चिंतेची बाब आहे.

 

मुंबई - ३९ 

पुणे मनपा - १६

नागपूर- ४

यवतमाळ - ४

नवी मुंबई - ३

कल्याण - ४

अहमदनगर - २

रायगड - १

ठाणे - १

उल्हासनगर - १

औरंगाबाद - १

रत्नागिरी - १

राज्यातील वाढता प्रादुर्भाव पाहता आरोग्यमंत्री राजेश टोपे यांनी जनतेला नियमांचं पालन करण्याचं आवाहन केलं आहे. आरोग्यमंत्री राजेश टोपे यांनी सांगितलं की, 'नव्या कोरोना बाधितांची जी संख्या समोर आली आहे. ती ज्यांना कोरोनाची लागण झाली आहे. त्यांच्या संसर्गातून झाली आहे. आपल्या सर्वांनाच काळजी घेण्याची गरज आहे. कोरोनाचा वाढचा प्रादुर्भाव पाहता राज्य शासनाने अनेक महत्त्वाचे निर्णय घेतले आहेत. त्यामुळे सर्वांना शिस्तीचं आणि नियमांचं पालन करणं आवाहन करतो, विनंती करतो. राज्यात संचारबंदी लागू करण्यात आलेली असून गरज असेल तरच बाहेर पडा, तसेच जीवनावश्यक वस्तूंसाठीच बाहेर पडा, असं आवाहनही बोलताना आरोग्यमंत्री राजेश टोपे यांनी केलं आहे.

महाराष्ट्रात सध्या संचारबंदी लागू असूनही ठिकठिकाणी गर्दी पाहायला मिळत आहे. याबाबत बोलताना राजेश टोपे म्हणाले की, 'महाराष्ट्रातील संचारबंदी ही कायदेशीर बाब आहे. त्यामुळे जर कोणी शिस्तभंग करण्याचा प्रयत्न केला, तर त्यांच्यावर कारवाई करण्यात येईल. 'मीच माझा रक्षक, याचं पालन करून स्वतःची काळजी स्वतःच घेणं गरजेचं आहे. जर कोणी नियमांचं पालन केलं नाही, तर त्यांच्यावर थेट कारवाई करण्यात येईल.'