एसटी चालक-वाहकचा प्रामाणिकपणा, 60 हजार रुपयांनी भरलेली पर्स प्रवाशाला परत

जव्हार : कोरोनाच्या अडचणीत उत्पन्नवाढीत पालघर एसटी विभाग राज्यात प्रथम क्रमांक मिळवल्यानंतर पुन्हा एकदा चर्चेत आला आहे. पालघर स्वारगेट शिवशाही एसटी बसचे चालक बाबासाहेब शेख आणि वाहक तनवीर राजे यांनी प्रामाणिकता दाखवत प्रवाशाची पैशांनी भरलेली पर्स परत केल्याने त्यांच्यावर अभिनंदनाचा वर्षाव होत आहे.

 

 

पालघर एसटी डेपोमधून स्वारगेटला जाणारी शिवशाही एसटी बस हे दोघेही घेवून जात होते. बुधवारी ही बस पालघर डेपोहून 11 वाजता सुटली. त्यानंतर ठाणे येथून काही प्रवासी चढल्यानंतर बसने पुढील मार्गक्रमण केले. यामध्ये एक तरुणी ठाण्यावरुन पिंपरी येथे जाण्यासाठी निघाली होती. तिची साठ हजार रुपये असलेली पर्स ती बसमध्येच विसरली. स्वतःच्या नादात ती पिंपरी येथे ही पर्स एसटी बस मध्येच विसरुन उतरली. एसटी बस स्वारगेट बस डेपोत पोहोचली.

 

पालघर डेपोची शिवशाही बस स्वारगेट डेपोत पोहोचल्यानंतर चालक शेख आणि वाहक राजे यांनी एसटीचा दरवाजा बंद करुन ते विश्रामगृहात विश्रामासाठी गेले. तेथे विश्राम करत असताना ही प्रवासी तरुणी त्यांच्याकडे रडत-रडत आली. त्यांनी तिची विचारपूस केल्यावर पैसे असलेली पर्स हरवली असल्याबाबत दोघांनाही सांगितले. त्यानंतर तिने बस तपासायला सांगितले. त्यानुसार, वाहक राजे यांनी चालक शिंदे यांना ही बाब सांगून बस तपासण्यासाठी पुढे पाठवले. चालक शेख यांनी ही एस टी उघडून एसटीमध्ये तपास केला असता तरुणी बसलेल्य आसनाखाली त्यांना ही पर्स सापडली. कर्तव्य दक्षता आणि प्रामाणिकपणा दाखवत शेख यांनी ही पर्स आणली आणि त्या तरुणीकडे सुपूर्द केली.

 

पर्स बघताक्षणी गोंधळलेल्या तरुणीच्या जीवात जीव आला. पर्स हातात घेवून ती रडू लागली. तिने चालक शेख आणि वाहक राजे या दोघांचेही मनःपूर्वक आभार मानले. या दोघांनी ही बाब पालघर डेपोला कळवली. पालघर डेपोच्या सर्व अधिकारी कर्मचाऱ्यांनी या दोघांचे अभिनंदन केले. कर्तव्य दक्षता आणि प्रामाणिकपणा दाखवून प्रवाशाची पर्स परत केल्यामुळे पालघरचे एसटी विभागाचे विभाग नियंत्रक राजेंद्र जगताप यांनी दोघांचाही सत्कार केला. चालक वाहकाचे सर्वांकडून कौतुक होत आहे.